एकाएक १२ भाईका पोल खोलेका राष्ट्रिय स्वतन्त्र पार्टीका सभापति रवि लामिछाने हाल मौन छन् । राजनितिक विषयमा उनको र उनको पार्टीको स्पष्ट धारणा आईरहेको छैन ।चितवन २ बाट भारी मतका साथ चुनाव जितेका रवि अस्वभाविक रुपमा सरकारमा सहभागी भए । लगत्तै सर्वोच्चले नागरिकतामा ऋटि देखाउदैं सांसद समेत नरहने गरि सबै सार्वजनिक पद खारेज गरिदियो । उनले सांसदको चुनाव लडेको रिक्त स्थामा आगामी वैशाख १० गते निर्वाचन हुदैछ ।उनी फेरि चुनाव लड्ने कसरतमा छन् । फेरि चितवन आउने र चुनाव जित्ने उनको लक्ष्य छ । जसका लागि उनी रणनिति निर्माणमा त केन्द्रित भएका छैनन् ? उनको यो चाहानामा अन्य दलहरुले के कस्तो सहयोग गर्लान् ? के उनले सहयोग मागिरहेका छन त ?
रवि लामिछानेले नेकपा एमालेका अध्यक्ष केपी ओलीसँग नजिकको सम्बन्ध विस्तार गरेका थिए । उनीहरूबीच बढ्दो निकटताकै कारण १० पुसमा प्रधानमन्त्री पुष्पकमल दाहाल ’प्रचण्ड’समक्ष ओलीले उपप्रधानमन्त्री तथा गृहमन्त्रीमा लामिछानेलाई प्रस्ताव गरेका थिए ।हुनलाई त्योभन्दा पहिला ओलीले राप्रपा अध्यक्ष राजेन्द्र लिङ्देनलाई गृहमन्त्रीको आश्वसन दिएका थिए । तर, झापाबाट लिङ्देन काठमाडौं आइनपुग्दै गृह मन्त्रालय लामिछानेको भागमा परेको थियो ।
त्यसपछि पनि निरन्तर ओलीले लामिछानेको पक्षमा बोलेका थिए । नागरिकता विवादमा पनि ओली लामिछानेको बचाउमा बोले । नागरिकता विवादकै कारण गृहमन्त्रीबाट हटेपछि त्यसपछि गैरसांसदको हैसियतमा मन्त्री बन्ने लामिछानेको चाहनामा ओलीले नै साथ दिएका थिए । त्यसका लागि ओलीले प्रधानमन्त्री प्रचण्डमाथि दबाब बढाए ।तर, प्रचण्डले ओलीको दबाबका बाजदुत लामिछानेलाई गृहमन्त्री बनाउन मानेनन् । प्रचण्डले त्यसो गर्नुको खास कारणचाहिँ ओलीले लामिछाने र लिङ्देनको साथ लिएर उच्चस्तरीय संयन्त्र र सरकारमाथि दबाब बढाएको आरोपसँग जोडिएको थियो । अर्थात्, लामिछाने मुख्यगरी ओलीसँग निकट सम्बन्ध राख्छन् र हरेक गठबन्धनमा ओलीलाई साथ दिन्छन् भन्ने अनुमान थियो ।
तर, एमाले जब राष्ट्रपति चुनाव प्रकरणबाट एक्लो हुने अवस्था आयो, त्यसपछि लामिछाने प्रधानमन्त्री प्रचण्ड र कांग्रेस सभापति शेरबहादुर देउवाको पक्षमा खुल्न थाले । ओलीको साथ पाइरहेका लामिछानेले एमालेसँग नै दूरी बढाउने प्रयास थाल्नुलाईचाहिँ रहस्यमय मानिएको छ ।संसदमा दरिलो साथ पाउने आश गरेका लामिछाने नै पछिल्ला दिनमा प्रचण्डसँग संवाद बढाएर सरकारमा हिस्सेदारी खोज्न थालेका छन् । स्रोतका अनुसार सरकारमा जाने वातावरण बनाउन लामिछानेले प्रधानमन्त्री प्रचण्डसँग मात्र होइन, कांग्रेस सभापति देउवासँग पनि संवाद बढाएका छन् ।
राहदानी मुद्दाबाट उम्किनका लागि लामिछानेले सत्तामा रहेका दलसँग निकट संवाद राखेको देखिन्छ । अमेरिकी नागरिकता र राहदानी हुँदाहुँदै नेपाली नागरिकता र राहदानी प्रयोग गरेको अभियोग लामिछानेमाथि रहेको छ ।नागरिकता मुद्दा किनारा लागेको भए पनि राहदानी मुद्दा किनारा लागेको छैन । राहदानी मुद्दा अगाडि बढ्दा लामिछानेको राजनीतिक जीवन नै जोखिममा पर्नेछ । सोहीकारण उक्त मुद्दा अगाडि नबढोस् भन्ने चाहना लामिछानेले राखिरहेका छन् ।त्यसका लागि शक्तिकेन्द्रसँग सम्बन्ध विस्तार गरिरहेका छन् ।