भरतपुर । पश्चिम चितवनमा कञ्चन खुल्ला पुरुष नकआउट भलिबल प्रतियोगिता हुने भएको छ । कञ्चन समाज विकास परिषद्, भरतपुर महानगरपालिका–२१, पार्वतीपुर, कञ्चनवस्तीको आयोजनामा छैठौं भलिबल प्रतियोगिता हुन लागेको परिषदका अध्यक्ष दुर्गा प्रसाद सुवेदीले बताएका छन् । माघे संक्रान्ति २०७९ को पावन अवसरमा भलिबल खेलकुद गर्न लागिएको उनले बताए ।

कञ्चन समाजको चाहना, खेलकुद विकासको कामना’ भन्ने मूल नाराका साथ यहि मिति २०७९ पौष २९ गतेदेखि माघ १ गतेसम्म सो प्रतियोगिता सञ्चालन हुदैछ । खेल कञ्चन समाजको खेल मैदान भरतपुर–२१, कञ्चनबस्ती, पार्वतीपुरमा हुनेछ ।

प्रतियोगितामा प्रथम पुरस्कार ५१ हजार रुपैंया, द्वितीय पुरस्कार ३१ हजार र सान्त्वना पुरस्कार दुई वटा समुहलाई ११÷११ हजार प्रदान गरिने अध्यक्ष सुवेदीले बताए । १६ समुह सहभागी रहने प्रतियोगितामा समुह दर्ता शुल्क दुई हजार पाँच रुपैया निर्धारण गरिएको छ । खेलकुद प्रतियोगिताका लागि आवश्यक आर्थिक सहयोग समेत संकलन भईरहेको परिषदले जनाएको छ । आफ्नो क्षमता अनुसारको सहयोग गर्न अध्यक्ष सुवेदीले अनुरोध समेत गरेका छन् ।