वीरगञ्ज । बोक्सीको आरोपमा पर्सामा एक महिलामाथि निर्घात कुटपिट भएको छ । जगरनाथपुर गाउँपालिका–३ खलुचडी बस्ने ६० वर्षीया सुदामा देवी चमइनमाथि कुटपिट भएको हो । उनलाई सोही ठाउँका ४ जनाले निर्घात कुटपिट गरेका हुन् ।

आइतबार बेलुका ७ बजेतिर आफ्नै घरमा आगो तापेर बसिरहेका बेला सुदामा देवीलाई सोही स्थान बस्ने नबी आलम राउत गदी, रैफुल मास्टर राउत गदी, बासदेव महरा चमार र सुरेश महरा चमारले कुटपिट गरेको पीडितका छोरा प्रभु महराले जानकारी दिए ।

उनीहरुले मलमुत्रसमेत खुवाउने प्रयास गरेपछि गाउँलेले उद्धार गरेको महराले बताए । कुटपिटबाट घाइते सुदामा देवीको घाँटी, हातखुट्टालगायतमा चोट लागेको तथा उनको नारायणी अस्पतालमा भइरहेको परिवारजनले बताएका छन् । कुटपिटमा संलग्न चारै जनाविरुद्ध प्रहरीमा उजुरी दिएको महराले बताए । कुटपिट गर्नेहरु फरार रहेका छन् ।