२३ जेठ, काठमाडौं । नेकपा एमालेका नेता योगेश भट्टराईले पार्टी एकताका लागि अध्यक्ष केपी शर्मा ओलीले गरेको आहृवान सकारात्मक भएको प्रतिक्रिया दिएका छन् । यसले कार्यदल स्तरको छलफललाई निरन्तरता दिने बाटो खोलेको उनले बताएका छन् ।
प्रधानमन्त्री समेत रहेका एमाले अध्यक्ष ओलीले पार्टी एकताका लागि ६बुँदे प्रस्ताव अघि सारेका छन् । पार्टीलाई ३ जेठ २०७५ अघि फर्काउन तयार भएका उनले विपक्षी दलका नेतालाई प्रधानमन्त्री बनाउन माग गर्दै सर्वोच्च अदालतमा परेको रिटको हस्ताक्षर फिर्ता लिनुपर्ने बताएका छन् ।
यसबारे सामाजिक सञ्जालमा प्रतिक्रिया दिँदै भट्टराईले अध्यक्ष ओलीको आहृवान सकारात्मक भएको बताएका छन् । ‘कार्यदल स्तरको छलफललाई यो बक्तब्यले पुन: निरन्तरता दिन बाटो खुलेको छ’ उनले भनेका छन्, ‘पार्टीका जिम्मेवार नेता कमरेडहरु सम्मिलित कार्यदलले स्पस्ट गर्नु पर्ने र मिलाउनु पर्ने थप बिषयहरुलाई समाधान गर्ने छ ।’
उनले अघि भनेका छन्, सर्वोच्चमा विचाराधीन बिषयमा सबै सम्भावनालाई ख्याल गर्दै र मुलतः संविधानको रक्षा, लोकतान्त्रिक प्रकृयाको निरन्तरता र पार्टी एकताको खातिर एउटा तार्किक निश्कर्षमा पुग्नु उपयुक्त हुनेछ ।’
यद्यपि अध्यक्षको वक्तव्यले पार्टीका शीर्ष नेतृत्वबीच सम्वाद हुने र एकताको एकता कायम राख्न मदत पुग्ने अपक्षा गरेको माधव नेपाल समूहमा रहेका नेता भट्टराईले बताएका छन् ।