काठमाडौं । प्रधानमन्त्री पुष्पकमल दाहाल (प्रचण्ड) सरकारले राष्ट्रिय योजना आयोगको उपाध्यक्षमा मिनबहादुर श्रेष्ठलाई नियुक्त गर्ने तयारी गरेको छ । श्रेष्ठ यसअघि पनि प्रचण्ड सरकारमा आयोगको उपाध्यक्ष थिए । उनी माओवादीनिकट अर्थशास्त्री मानिन्छन् । सत्तागठबन्धनमा भागबण्डाको सहमति भएको बताईएको छ । बढीमा ७ जनाको योजना आयोगलाई पूर्णता दिने तयारी भइरहेको प्रधानमन्त्री कार्यालयले जनाएको छ ।

अबको मन्त्रिपरिषद बैठकबाट आयोगमा उपाध्यक्ष र सदस्यहरूको नियुक्ति हुने तयारी छ । माओवादी कोटाबाट थप एक सदस्यमा रामकुमार फुयालको नाम तय भएको छ । उनी यसअघि पनि योजना आयोगको सदस्य थिए ।

एमालेबाट पुनःनिर्माण प्राधिकरणका पूर्वसीईओ सुशील ज्ञवाली र योजना आयोगका पूर्वसदस्य कृष्णप्रसाद ओलीको नाम प्रधानमन्त्रीलाई दिइएको बताइएको छ । ज्ञवालीले भने उपाध्यक्ष नपाए सदस्य नबन्ने बताए पनि पार्टीले उनलाई योजना आयोगमा पठाउन लागेको स्रोतले जनाएको छ ।

एकजना महिला सदस्य एमाले वा सत्तागठबन्धनका अन्य दलबाट पठाइने बताइएको छ । राप्रपा र रास्वपाले समेत योजना आयोगमा प्रतिनिधित्व मागेका छन् ।