चौधरी फाउण्डेसनले देशकै जेठो वीर अस्पतालमा आइसियू वार्ड स्थापना गरी अस्पताल व्यवस्थापनलाई हस्तान्तरण गरेको छ। कोभिड–१९ को दोस्रो लहरबाट संक्रमित सर्वसाधारण नेपाली नागरिकको उपचारमा योगदान पुर्‍याउन फाउण्डेसनले वीर अस्पतालमा आइसियू वार्ड निर्माण गरेको हो।

चौधरी फाउण्डेसनका उपाध्यक्ष निर्वाण चौधरीले वीर अस्पतालमा आयोजित एक संक्षिप्त कार्यक्रमबीच कोभिड युनिफाइड केन्द्रीय अस्पताल (वीर अस्पताल)का कार्यकारी प्रमुख प्रा.डा.जागेश्वर गौतमलाई आइसियू वार्ड हस्तान्तरण गरे। वीर अस्पताल नयाँ भवनको पहिलो तलामा नौं शय्या र दोस्रो तलामा नौं शय्याको गरी कुल १८ शय्याको आइसियू वार्ड निर्माण भएको छ। विश्व बजारमा उपलब्ध पछिल्लो प्रविधि प्रयोग गरेर आइसियू वार्ड निर्माण गरिएको छ। अस्पतालले यी तलामा हाल कोभिड संक्रमित विरामीहरूको उपचार शुरू गरेको छ।

चौधरी फाउण्डेसनका अध्यक्ष विनोद चौधरीले सर्वसाधारण नेपाली नागरिकको उपचारमा सहज पहुँच भएको वीर अस्पतालमा आइसियू वार्ड स्थापना गरी नेपालीको सेवामा समर्पित गरिएको बताए।

‘कोरोनाबाट संक्रमित नेपाली नागरिकको जीवन रक्षा गर्नु अहिले हाम्रो सबैभन्दा महत्वपुर्ण दायित्व हो’ उनले भने ‘यसका लागि सबै नेपालीको पहुँच रहेको अस्पताललाई सुविधासम्पन्न बनाउनुपर्ने जिम्मेवारी हामीले बोध गर्‍यौँ।’

वीर अस्पतालजस्ता सार्वजनिक अस्पतालहरूको सेवा र पहुँच विस्तार गरिनु आवश्यक रहेको उनले बताए। 

चिकित्सा विज्ञान राष्ट्रिय प्रतिष्ठान (नाम्स) का उपकुलपति प्रा. डा. देव नारायण शाहले कोभिड महामारीको संवेदनशिल समयमा वीर अस्पतालमा १८ शय्याको आइसियू वार्ड निर्माणमा योगदान गरेर चौधरी फाउण्डेसनले समाजसेवामा उत्कृष्ट भुमिका निर्वाह गरेको बताए। 

कोरोनाका कारण क्रिटिकल अवस्थामा पुगेका सर्वसाधारण नेपालीको जीवन रक्षामा यो आइसियू वार्ड वरदान सावित हुने विश्वास लिइएको उनले बताए। ‘पैसा हातमा भएर मात्रै पनि यति छिटो समयमा आइसियू निर्माण गर्न सम्भव थिएन, तर, चौधरी फाउण्डेसनको सक्षम व्यवस्थापनका कारण मात्रै यो सम्भव भएको हो’, प्रा. डा.शाहले भने।      

 

कोभिड युनिफाइड केन्द्रिय अस्पताल (वीर अस्पताल)का प्रमुख कार्यकारी प्रमुख प्रा.डा. जागेश्वर गौतमले कोरोना महामारीसँग जुध्न चौधरी फाउण्डेसनले पुर्‍याएको योगदानका लागि धन्यवाद दिँदै यसले आम नेपालीको उपचारमा ठूलो सहयोग पुग्ने बताए। 

यस अस्पतालमा अक्सिजन प्लान्टको पनि निर्माण भइरहेको छ। चौधरी फाउण्डेसनको समन्वय र नविल बैंकको वित्तिय सहयोगमा अक्सिजन प्लान्ट स्थापना गर्न लागिएको हो। आगामी केही दिनभित्रै उक्त अक्सिजन प्लान्ट पनि हस्तान्तरण गर्ने लक्ष्य लिइएको छ। 

चौधरी फाउण्डेसनले गत बर्ष कोरोनाको पहिलो लहरमा भेन्टिलेटर, पिसिआर रिएजेनदेखि पिपिई र स्वास्थ्य सामाग्री देशभरका अस्पतालहरूमा उपलब्ध गराएको थियो। 

 

प्रकाशित मिति: बिहीबार, जेठ २७, २०७८, १८:१९:००