काठमाडौं–राष्ट्रिय स्वतन्त्र पार्टी (रास्वपा) ले सरकारमा सहभागिता जाने वा नजाने विषय अब शुक्रबार मात्रै निर्णय लिने भएको छ ।सोमबार पार्टी कार्यालय बसुन्धारामा बसेको केन्द्रीय समिति बैठकमा केन्द्रीय सदस्यहरूले सरकारमा जाने वा नजानेबारे आ–आफ्ना धारणा राखेका छन् । केन्द्रीय सदस्यहरूको धारणा नआइसकेकोले पार्टीले शुक्रबार मात्रै निर्णय लिने भएको हो ।

महामन्त्री डा. मुकुल ढकालकाअनुसार सरकारमा जाने वा नजानेबारे शुक्रबार पार्टीले निर्णय लिने छ ।साविककै मन्त्रालय पाउने स्थिति बनेमा र सरकारका न्यूनतम साझा कार्यक्रम पुनर्लेखन गर्न प्रधानमन्त्री पुष्पकमल दाहाल ‘प्रचण्ड’ तयार भएमा सरकारमा जान सकिने विषयसमेत बैठकमा केन्द्रीय सदस्यहरूले धारणा राखेका थिए ।पार्टीले सभापति रवि लामिछानेलाई पार्टी संसदीय दलको नेता बनाउने निर्णय गरेको छ ।