भरतपुर । कपुरबोट डटकमका कार्यकारी सम्पादक विप्लव काफ्ले पुरस्कृत भएका छन् । रिपोर्टर्स क्लब नेपालको रजत महोत्सवको अवसरमा काफ्ले पुरस्कृत भएका हुन् । उनले उत्कृष्ट युवा पत्रकारिता पुरस्कार २०७९ प्राप्त गरेका छन् । पुरस्कार प्रधानमन्त्री पुष्पकमल दाहाल प्रचण्डले हस्तान्तरण गरेका थिए । काफ्ले डेढ दशकदेखि पत्रकारितामा सक्रिय छन् ।

उनी कालिका एफएमको समाचार प्रमुख, कायाकैरन दैनिकको समाचार सम्पादक, अभियान टिभिको समाचार प्रमुख भएर काम गरिसकेका थिए । रेडियो त्रिवेणी, क्रिष्टल टिभि लगायतका मिडियामा समेत काम गरेका थिए ।

कारोबार दैनिकको चितवन संवाददाता समेत रहेका काफ्लेले नेपाल प्रेस अनलाइन, सगरमाथा टिभिमा समेत चितवन संवाददाता बनेर काम गरे । नेपाल प्रेस युनियन चितवनको कोषाध्यक्ष रहेका काफ्ले पत्रकार महासंघ चितवनको कार्यसमिति सदस्य हुन् । चितवनका सामाजिक, आर्थिक, विकासका विषयमा कलम चलाउँदै आइरहेका छन् । पुरस्कार राशि १५ हजार रुपैयाँ रहेको छ ।