भरतपुर । कालोमोसो दस्ताका केन्द्रीय संयोजक शम्भु थापा पक्राउ परेका छन् । नेता दुर्गा प्रसाईको धर्म, संस्कृति, राष्ट्र, राष्ट्रियता र नागरिक अभियानलाई सघाउन बनेको दस्ताका संयोजक थापा चितवनबाट मंगलबार पक्राउ परेका हुन् । जिल्ला प्रशासन कार्यालयमा छलफलमा बोलाएर थापालाई पक्राउ गरेको स्रोतले जनाएको छ ।

उनी चितवनका हुन् । भरतपुर तरकारी तथा फलफूल प्रालिका अध्यक्ष थापा पछिल्लो समय प्रसाई निकट बनेका हुन् । उनी यसअघि माओवादी केन्द्र निकट थिए । धर्म, संस्कृति, राष्ट्र, राष्ट्रियता र नागरिक अभियानको चितवन अभियन्ता मेघराज पौडेलले तत्काल रिहा नगरिए आन्दोलन गर्ने चेतावनी दिएका छन् ।

जिल्ला प्रहरी कार्यालय चितवनले भने सोधपुछका लागि नियन्त्रणमा लिएको जनाएको छ । फागुन १३ गते नारायणी नदी किनारमा आयोजित अभियानको कार्यक्रममा कालोमोसो दस्ता घोषणा गरिएको थियो । बैंक तथा वित्तिय संस्थालाई निशाना बनाएर काम गर्ने लक्ष्य दस्ताले लिएको थियो ।